Herbstwanderung 2018
«Via Stockalper»
D Herbschtwanderig vo der Zytbörse het üs, füfzäh Mitglieder, i ds Wallis gfüehrt. Pünktlech, hei mir i ds reservierte Abteil im Schnällzug nach Brig chönne ystige. Mit em komfortable Poschi isch es de Richtig Simplon-Pass losgfahre. Bereits nach churzer Zyt het men e wunderbari Ussicht uf die umliegende Bärge übercho. Es het eim ddünkt, me schwäbi so richtig überem Rhonetal. Öppe uf halber Höchi zum Pass, hei mir die moderni, markanti Ganterbrügg – über ds Gantertal – passiert, ydrücklech! Uf der Passhöchi het üs der Steiadler – es Mahnmal a Zwöite Wältchrieg, ganzi acht Meter höch – begrüesst. Hie, im Hotel Monte Leone isch der erscht Caféhalt yplanet gsy ... mit oder ohni Gipfeli.
Nach dere Sterchig hei mir du die «Via Stockalper» under d Bärgschueh gno. Der Wanderwäg füehrt über Moorlandschafte, dür Erlegebüsch. D Lärche, wo i de Wiese mit de verströite riesige Felsbrocke, hei ihri typisch gälbi Herbschtfarb no nid aagno. Bim alte Spittel git’s e churze Fototermin. Underwägs, bi mene luschtig als Fuchschopf präparierte Boumstrunk, isch d Mittagspouse mit Verpflegig usem Rucksack, aagseit gsy. Ds Ganze isch mit eme luschtig-gschpässige Quizz mit Scherzfrage, beläbt worde. Es hei ou drü Pryse gwunke. Jitz, wüsse mir alli was vier Bei het, u flügt – u weles Tier Hüehnerouge am Chopf het...
Ds Simplon-Dorf, isch üs under anderem, ou für syner berüehmt-wunderbare Crèmeschnitte vo der Beckerei Arnold schmackhaft gmacht worde. Dört hei mir üs alli niederglaa, u hei di willkommeni Pouse, bis zur Rückfahrt mit em Poschi, mit verschiedene Getränk u diverse Stückli us der Bachstube gnosse. Ma cha aber im Dorf ou ächte Wallisserchäs ychoufe. Da isch es für en Ufbruch Zyt worde. Im Dorf, isch en Art Gränzstei erhalte, wo a Bou vo der strategisch wichtige, breite Keiserstrass erinneret – Napoleon 1801.
Ds Poschi nach Brig isch rächt pünktlech ytroffen und het für üs alli non es Plätzli gha. Z’ Brig, isch es no churz drum ggange, längt es, für die gluschtige Marroni la mitzloufe?
Uf der Rückfahrt düre Tunu, het me de zfridene Gsichter vo de Teilnähmer/inne, chönne abläse, dass sie alli e wunderschöne Tag hei dörfe erläbe. Danke Sonja!
Ali Chiquet
